دايما الكل بيشتكى من البسبوسة وانها مش بتظبط معاه في البيت وبيقولوا انها بتنشف منهم أوي
كتير نفسهم يعملوا في البيت بسبوسة زي بتاعة المحلات وتطلع طرية وناعمة معاهم
طيب ازاي نعملها وتطلع حلوة وطرية
الاول فيه أكتر من شرط علشان تطلع البسبوسة حلوه
أول شرط ان لازم البسبوسة تتسقي الشربات وهي سخنه والشربات كمان يكون سخن .
ثاني حاجه انك تغطيها بعد ما تسقيها الشربات وتسبيها متغطيه لحد ما تبرد.
تالت شرط انك وانتي بتعمليها ماتعجنيهاش كتير بالعكس يدوبك تقلبي المكونات مع بعض والأهم انك تلاحظي ان العجينة مرملة مش ناعمة زي الكيكة.
رابع شرط ان الشربات يكون خفيف مش تقيل زي شربات الكنافة.
نيجي بقى للطريقة
نجيب بولة كبيرة ونحط فيها كوبيتين ونص من دقيق السميد ونضيف عليهم كوباية جوز هند وكوباية سكر ومعلقتين بيكنج بودر صغيرين ومعلقة فانيليا ونقلبهم مع بعض
نسيح كوباية سمن ونقلبه في الدقيق ونضيف عليهم كوباية زبادي ونقلبهم معا حتى نحصل على عجينة رملية سايلة نسبيا.
نجهز صينية دائرية وندهنها بالسمن ونرش طبقة خفيفة من دقيق السميد
نصب خليط البسبوسة في الصينية وبعدين نقطعها وهي لسه نية ونحط مكسرات على الوش لو عاوزين.
نحطها في الفرن على درجةحرارة 180 درجة مئوية لحد ما تستوي وتحمر من فوق وتحت.
نطلعها من الفرن ونحط عليها الشربات وهو كمان يكون سخن.ونغطيها ونسبها لحد ما تبرد خالص وبعدين نقطعها وبالهنا والشفا على قلبكم ..
ليست هناك تعليقات:
إرسال تعليق