جوزك بيحب المكرونة بالبشاميل بس انتي بتحسيها صعبه ومش بتعرفي تظبطيها
البشاميل دايما بيبوظ منك وبيبوظلك الصينية
صينية المكرونة بالبشاميل دي من أسهل الاكلات فعلا بس عاوزه صبر علشان ليها أكتر من خطوه
عندنا خطوة سلق المكرونة وطبعا دي مافيهاش أي حاجه إنتي بتجيبي مكرونة أقلام وبتسلقيها في ماء مغلي مملح على النار لحد ما تتسلق تلت ارباع سلق وبعدين تشيليها وتصفيها وتشطفيها كويس.
الخطوة التانية نجهز اللحمة المعصجة ودي بنجيب بصل ونفرمها ونجيب طاسه نحطها على النار ونحط ملعقة سمنة ونحط البصلة ونشوحها لحد ما تدبل وبعدين نحط اللحمة المفرومة ونقلبها مع البصل لحد ما لونها يتغير وممكن كمان تضيفي معاها فلفل ألوان أو فلفل رومي أخضر ونتبلها بالملح والفلفل والقرفة والزنجبيل ونتركها على النار تستوي مع قليل من الماء.
نيجي بقى للخطوة المهمة واللي الكل بيشتكي منها وهي خطوة عمل البشاميل كل اللي انتي عاوزاه دقيق وسمن ولبن بتحطي في حلة ملعقتين كبار من السمن وتتركيهم لحد ما يسيحوا ويسخنوا بتحطي ع ملاعق دقيق وتقلبيهم بسرعه في السمن الساخن حتى يبدأ الدقيق يغير لونه وتخرج رائحته وقتها بنضيف عليه اللبن البارد واهم حاجه يكون بارد على ونقلبهم بسرعه ونسيبه على النار مع التقليب من وقت للتاني لحد ا يغلي ويتقل شويه بشويه نرفعه من على النار وسيبه يبرد شويه.
نيجي بقى نجهز الصينية الاول بندهن الصينية كويس بالسمنة وبعدين نفرش عليها طبقة من البقسماط الناعم وده يخليها ماتلزقش في الصينية
نحط نص كمية البشاميل على المكرونة المسلوقة ونقلبهم مع بعض ونحط نص كمية المكرونة في الصينية وبعدين نحط عليها اللحمة المعصجة ونحط بقية المكرونة.
نضيف بيضة على باقي البشاميل ونخفقها كويس جوه البشاميل مع رشة ملح وفلفل ونصب باقى البشاميل فوق المكرونة ونحطها في الفرن حوالي نص ساعة علشان تتشمع لمكونات وبعدين نولع الشواية ونحمر الوجه ... وبالهنا والشفا على قلبكم
ليست هناك تعليقات:
إرسال تعليق